ILOILO CITY – Wala sang sin-o man nga makaangkon sang “DINAGYANG”.
Ini ang pagpahayag ni Illoilo City Mayor Jerry Treñas bangud sa pagrehistro sang “Dinagyang” mark bilang trademark sang Iloilo Dinagyang Foundation Inc.
Sa interview sang Bombo Radyo kay Mayor Treñas, iya ginpahayag nga kahalam-utan nga gin-register sang Iloilo Dinagyang Foundation Inc. nga ila ang DINAGYANG.
Suno sa iya, ang katungdanan sang foundation amo lamang ang pag-operate apang nagapakita lamang ini sang ila intensyon.
Wala naman gin-athag ni Treñas kun ano ang iya ginatumod nga intensyon.
Pahayag sang alkalde, indi negosyo ang DINAGYANG kundi isa ini ka festival.
Nagpaandam man si Treñas sa Iloilo Dinagyang Foundation Inc. nga handa siya kaupod ang pipila ka mga abogado kag mangin ang mga Ilonggo nga makigbato kun luyag gid man sang foundation nga negosyohan ang DINAGYANG.
