ILOILO CITY – Naghatag duag ang Tribu Panayanon nga kampeon sa Dinagyang Festival 2018 kag ang Tribu Hubon Mangunguma gikan sa San Lorenzo, Guimaras nga kampeon sa Manggahan Festival, sa selebrasyon sang Filipino-american community sang 120th Philippine Independence Day sa New York.
Suno kay Florence Hibionada, head secretariat sang Iloilo trade mission nga nagpadulong sa New York, ginpalakpalakan kag ginhugyawan sang mga tumalambong ang performances sang Tribu Panayanon kag Tribu Hubon Mangunguma.
Tuman ka sadya kag daw kaangay nga fiesta ang kahiwatan suno kay Hibionada.
Nabulong naman ang kahidlaw sang mga Pinoy ilabi na ang mga Ilonggo, sang masaksihan ang performance sang mga tribu.
Nagkalain-lain nga mga Filipino-American groups ang nagtambong nga nakasuksok pa sang T-shirt nga may hayahay sang Pilipinas kag may dala nga mga flaglets, ang nagbantay sa ruta sang parada.
Nag-perform man ang mga Pinoy Broadway stars sa New York kag isa na diri ang Ilonggo Tony kag Grammy-winner nga si Jhett Tolentino nga tumandok sang Calumpang, Molo.
Ginpangunahan naman ni Mayor Jose Espinosa III ang flag raising ceremony sa amo nga kahiwatan.