ILOILO CITY- Magapatukod sang Dinagyang monument ang mga Augustinians bilang pagpasidungog sa 500th anniversary sang pag-abot sang Kristiyanismo sa pungsod kag ang 500th anniversary sang pag-abot man kag paghatag sang imahe ni Santo Niño kay Queen Juana sang Cebu sang 1521 ni Ferdinand Magellan.
Ang monument nga isa ka Bronze Commemorative Tableaux nga ipahamtang sa Iloilo Esplanade malapit sa University of San Agustin ang magapakita sang tatlo ka historical events sang 1521, 1565 kag 1968.
Sa interview sang Bombo Radyo kay Rev. Fr. Frederick Comendador, OSA, presidente sang University of San Agustin, iya ginpahayag nga ini ang ila pamaagi agud ipahanumdom sa bag-o nga henerasyon ang legasiya sang pagtuo kag kon paano ang pagtuo kag ang imahe ni Sto. Niño nagtandog sang kabuhi sang mga Filipino kag nagpabakod sa aton sa atubang sang madamo nga mga pagtilaw.
Suno kay Father Comendador, bangod sini, kinahanglan nga padayunon ang ini nga debosyon.
Dugang pa niya, si Sto. Niño nga isa ka Diyos nga nagpakatawo, ang makatudlo sa aton sang balor sang pagpakamainubuson, pagkamatinatapon kag paghatag sang serbisyo para sa kaayuhan sang katawhan.
