Liwat nga nakadaog sang prestihiyoso nga tourism award ang world-class nga Dinagyang Festival sang syudad sang Iloilo.
Sa ginpatigayon nga national convention sa Baguio City, ginkilala sang Association of Tourism Officers of the Philippines Inc. (ATOP) ang 2024 Dinagyang bilang Grand Champion sa Best Cultural Festival Award.
Sa interview sang Bombo Radyo kay Iloilo Festivals Foundation Inc. (IFFI) Executive Director Ms. Joyce Ann Clavecillas, iya ginpahayag nga natigayon ang panibag-o nga kadalag-an paagi sa pagbinuligay sang syudad, sponsors, participants, artists, mga ahensya, organisasyon, volunteers, kag madamo pa.
Sa 2024 Festival, nagsentro ang kahiwatan sa tema nga “Pagdayaw kay Señor Santo Niño, Padayaw sang mga Ilonggo.”
Ginapatigayon ang Dinagyang sa kada Enero bilang pagdayaw kay Santo Niño ukon Child Jesus. Ginadagsa ini sang linibo ka mga local kag foreign tourists.
Matandaan nga sang 2023 ATOP National Convention sa Boracay Island, grand winner man ang Dinagyang para sa Best Cultural Festival sa city category.
Sang 2021, ang digital nga bersyon sang festival ang nagdaog sang Best Tourism Practice during the Pandemic Award nga amo ang isahanon nga pasidungog nga ginhatag sang ATOP sa amo nga tuig. Sang 2022, ginpasidunggan naman ang Dinagyang bilang Best Tourism Event sa contemporary/non-traditional expression category.
(Photo: Iloilo Dinagyang Festival/FB)
