ILOILO CITY – Masaksihan sang mga Ilonggo sa bilog nga kalibutan subong nga adlaw, Enero 24, ang sahi sang Dinagyang nga indi maupangan sang anuman nga pandemya.
Ini ang kadungan sang pagpakita sang pre-filmed performance videos sang mga tribu nga nagatiglawas sang pito ka mga distrito sang syudad.
Magluwas sa performance sang mga digital warriors, ang 360-view Dinagyang ang magapasundayag man sang nanuhay-tuhay nga shots sang mga tourist spots sa Iloilo City lakip na ang daan kag maragtason nga mga simbahan, dalanon, plaza, esplanade, kag madamo nga iban pa.
Sa interview sang Bombo Radyo kay Iloilo City Mayor Jerry Treñas, iya ginpahayag nga bunga ini sang kaisog kag kaalam sang mga artists, directors, choreographers, kag working committees sa likod sang Iloilo Festivals Foundation Incorporated (IFFI).
May mga gin-agda man nga iban nga mga bisita nga mahimo makaupod sa mga Ilonggo sa paglantaw sang virtual performances sang mga tribu.
Suno naman kay Atty. Joebert Peñaflorida, presidente sang IFFI, handa na ang tanan nga materyal kag i-play na lang umpisa 7:00 subong nga aga.
Para sa mga tribu, may mga special awards nga mabaton kaangay sang: People’s Choice Award, Best in Choreography, Best in Performance, Best in Music, kag Best in Production Design.
Ang tanan nga perfomances sang mga tribu kag ang istorya sa likod sang tagsa ka presentasyon ang mahimo mabatian kag malantaw live sa Bombo Radyo Iloilo, sa Facebook Live, kag sa www.bomboradyo.com, ang official website sang Bombo Radyo Philippines.
