DINGLE, ILOILO – Nagapadayon ang kampanya sang Local Government Unit sang Dingle agud mapapas ang rice black bugs infestation.
Ini bangud nagtuga sang halit sa mga mangunguma ang nasambit nga peste sa mga humayan.
Sa interview sang Bombo Radyo kay Marfe Quinlat, Municipal Agriculture Officer sa banwa sang Dingle, iya ginpahayag nga .5 ka ektarya sang humayan sa Barangay Tabugon, Dingle, Iloilo ang apektado sang peste.
Suno kay Quinlat, indi ini ang una nga bes nga nag-atake ang rice black bugs sa banwa bangud una ini nga nasiplatan sang 2010.
Ginpahayag dugang sang natungdan nga ginatinguhaan na sang opisina nga mapapas ang peste pinaagi sa biological control agent nga ginatawag nga ‘Metarhizium’ nga isa ka sahi sang fungus nga i-spray lang sa talamnan nga may tubig, kag sa sulod sang tatlo tubtob pito ka adlaw, amat- amat nga nagamasakit ang rice black bugs tubtob mapatay.
Nahibaluan nga magluwas sa banwa sang Dingle, apektado man ang mga banwa sang Janiuay,Cabatuan, Pototan, Concepcion, kag Banate sang rice black bugs infestation.
