Ginpunto ni House Prosecutor Rep. Chel Diokno ang importansiya sang mga dokumento kag rekord sa Article II sang impeachment trial ni Vice President Sara Duterte kag gin-insister nga wala lamang nakasandig sa testimonya sang mga saksi ang mga ebidensiya nga ipresentar sa trial.
Ini ang paathag ni Diokno sang ginhingyo ni Senator-Judge Lito Lapid nga iplastar sa mas mahapos mahangpan nga paagi ang nagapanguna nga punto sang Article II sa tunga sang madamo nga testigo, numero kag dokumento nga ginatalakay sa Senado.
Suno kay Diokno, kalakip sa mga ebidensiya nga dapat lantawon amo ang mga bank records kag mga rekord halin sa Anti-Money Laundering Council (AMLC), Bureau of Internal Revenue (BIR) kag Securities and Exchange Commission (SEC).
Suno pa sa mamalidha, ini nga mga dokumento ang mahimo nga ma-verify, kalakip ang mga rekord nga direkta nga ginpadala sang mga bangko sa impeachment court.
Suno sa iya, importante nga malantaw ang mga numero nga nakasulod sa mga dokumento bangud nga wala nagabutig ang mga numero.
Dugang pa ni Diokno, labaw pa sa mga numero ang nakataya sa kaso bangud naangot ini sa pagsalig sang publiko, katampad sa pagpanumo, kag salabton sang mga opisyal sang gobyerno.
