Ginpaathag ni University of the Philippines Institute for Maritime Affairs and Law of the Sea director Jay Batongbacal nga wala nagakahulugan nga mahina ang isa ka nasyon kun pilion sini ang diplomasya sa isyu sa West Philippine Sea.
Ini nga statement ang kasunod sang agresibo nga pagbalabag sang China Coast Guard sa mga sakayan sang Pilipinas sang nagligad nga Lunes, Hunyo 17, kun sa diin ginpangkuha ang ila dala nga mga rifles nga dal-on kuntani sa BRP Sierra Madre sa Ayungin Shoal, ginguba ang mga equipment, ginpangtayaan sang sticks kag patalom ang mga Pinoy, ginbuslutan kag ginpakupos ang rubber boat, kag ginpalibutan ang mga Pinoy tubtub nga isa ka Navy personnel ang nautdan gid sang tudlo.
Suno pa sa nasambit nga maritime law expert, may mga kaso sa iban nga mga pungsod nga nakaangkon man sila sang damages kag injuries apang wala nagresulta sa giera bangud nga naresolba man ini paagi sa diplomasya kag kumpensasyon.
“Sa ibang mga bansa marami nang mga ganyang klaseng insidente, nagkaroon ng damage nagkaroon ng injury, in the end hindi sila nagigiyera. Naresolve pa ‘yon sa pamamagitan ng diplomasya, compensation later on, mga ganoon,” pahayag sini sa isa ka news forum.
Wala ini nagapakita nga naga-surrender na lang basta-basta ang Pilipinas suno sa professor kundi isa ka pagdemonstrar nga mas deliberate ang pungsod sa gusto sini matabo.
“Hindi ‘yon indication ng weakness, hindi ‘yon ibig sabihin na sumusuko tayo, pero in fact pinapakita natin na hindi tayo napipilit, naapektuhan nito, kumbaga, mas deliberate talaga ‘yong ating gustong mangyari,” dugang sini.
Ginsaad sini nga ang pagkabig nga “misunderstanding” lang ukon “aksidente” ang natabo sa Ayungin Shoal ang mahimo mangin lyabe para sa diplomatic solution sa tunga sang Pilipinas kag China. Ini magahatag ligwa man para sa makalab-ot sa diplomatic kag malinong nga solusyon suno pa sa natungdan.
Gindugang man sini nga isa ka peaceful country ang Pilipinas nga indi mag-kumporme sa gyera bilang instrumento sang national policy.
Una na nga ginpahayag ni Executive Secretary Lucas Bersamin nga indi armed attack ang ginhimo sang China sa Ayungin sang Lunes — bagay nga gin-ugyunan man sang Philippine Coast Guard bangud ginpahayag nga ang intensyon sang People’s Republic of China amo nga balabagan lamang ang resupply mission agud indi makalab-ot sa BRP Sierra Madre.#Dio
