Nagpangayo sang clearance ang local government unit sang Dumangas, Iloilo sa Department of Health agud mapatigayon ang direct burial sang isa ka residente nga nagtaliwan bangud sa COVID-19.
Ini ang kasunod sang temporaryo nga pag-untat sang operasyon sang nagaisahanon nga crematorium facility sa Panay Island.
Sa interview sang Bombo Radyo kay Dumangas, Iloilo Mayor Ronaldo ‘Onal’ Golez, iya ginpahayag nga sa bulig man sang punerarya, nalubong gilayon ang isa ka pasyente nga napatay bangud sa COVID-19.
Suno kay Golez, plano naman subong sang banwa nga magbakal sang duta agud himuon nga lulubngan sang mga napatay bangud sang virus bangud indi man tanan ang pabor kag makasarang sa cremation sang himata.
SA PAVIA, ILOILO:
Ginpalapad pa ang Public Catholic Cemetery sa Pavia, Iloilo agud mapahimuan sang dugang nga lulubngan para sa mga residente nga napatay bangud sa COVID-19.
Sa interview sang Bombo Radyo kay Pavia, Iloilo Mayor Luigi Gorriceta, iya ginpahayag nga ginapasigurado ang kadalumon sang duta nga mahimo lubngan sang mga napatay bangud sa virus.
Nagakadapat man suno sa alkalde nga 12 ka-oras matapos napatay, mapalubong gilayon ang bangkay kag masirado sang maayo ang duta nga lubngan.
Nagalaom man si Mayor Gorriceta nga indi na madugangan ang numero sang mga napatay sa banwa bangud sa COVID-19.
