Nagdepensa si Police Regional Office (PRO) 6 Director Police Brigadier General Jack Wanky sa panawagan nga i-abolish ang Philippine National Police Academy (PNPA).
Sa interview sang Bombo Radyo kay Director Wanky iya ginpahayag nga ang tanan nga organisasyon ang may kapaltahan kag indi perpekto.
Suno kay Wanky, isa ka unfair nga desisyon kon i-abolish ang nasambit nga organisasyon bangud daw kaangay nga ginpabay-an ang efforts kag sakripisyo sang mga nagtukod sang PNPA.
Naghingyo man ang natungdan nga lantawon ang positibo nga bahin nga nahatag sang organisasyon sa pungsod kag ikonsidera ang mga maayo nga nadulot sini.
Nagapati man ini nga mabalik sang PNPA ang maayo nga panan-awan sang kadam-an bangud padayon ini nga nagaserbisyo paagi sa paghimo sang dekalidad nga kapulisan.
Nahibaluan nga ang mga panawagan nga i-abolish ang PNPA nagtuhaw matapos nga ang tatlo sa mga graduates sini—Commissioner Edilberto Leonardo of the National Police Commission, former PCSO general manager Royina Garma, kag Lt. Col. Santi Mendoza— ang na-involve sa pagpatay kay PCSO board secretary Wesley Barayuga, retired police general kag graduate sang Philippine Military Academy (PMA).
