ILOILO – Nagpaandam ang regional director sang Police Regional Office VI sa mga katapo sang kapulisan sa Western Visayas nga indi gid mag-ilog sa pulis nga nagpatay sa mag-iloy sa Paniqui, Tarlac.
Ini bangud sa nag-viral nga video sang mga biktima kaupod ang suspek kag ang iya anak samtang nagabaisay tubtub ginpatay sang pulis ang mag-iloy.
Ang mga biktima amo sanday Sonya Gregorio, 52 nga amo ang iloy kag anak sini nga si Frank Anthony Gregorio, 25, residente sang Barangay Cabayaoasan, Paniqui, Tarlac.
Samtang ang nangluthang naman nga pulis amo si Police Senior Master Sgt. Jonel Nuezca, naka-destino sa Parañaque City Crime laboratory unit.
Sa exclusive interview sang Bombo Radyo kay PBGen. Rolando F. Miranda, iya ginpahayag nga kun kaisa indi mapaktan ang utok ukon kondisyon sang paminsaron sang isa ka pulis.
Apang may kaangtanan sa isa ka pulis nga nagpangluthang-patay, wala man sang threat sa sitwasyon sa kabuhi niya para magpanginit kag magpangamot.
Suno kay Miranda, tuman kasubo ang iya nakit-an bangud nalakip pa ang bata sang nasambit nga pulis sa insidente, sa diin nasaksihan pa sini ang natabo nga mahimo tunaan sang pagkatrauma sini hasta magdako.
Nagpanugyan man ang natungdan sa Philippine National Police nga dapat sa pagrecruit sang kapulisan, magapatigayon man sila sang anger management kag career development courses.
Ginpahayag man ni Miranda nga indi niya mabasol ang mga pumuluyo nga naga generalize sa mga kapulisan bangud sa kapaltahan sang isa ka pulis.
Apang apisar sini, dako ang kumpyansa ni Miranda sa PNP sang Western Visayas nga may yara sang malaba nga pasensya.
Nagamando man ang natungdan sa mga kapulisan nga iya nasakupan nga bag-o mag-obra sang tikang, paminsaron gid anay ang resulta.
