ILOILO CITY – Nagmandu na sang maid-id nga imbestigasyon ang Police Regional Office VI batuk sa hubog nga pulis nga nagpamahog, nagpanaya-taya kag nagpalupok sang iya service firearm sa Barangay Buntatala, Jaro, Iloilo City.
Ang pulis amo si Police Staff Sergeant Nico Galvesolo, 38, residente sang nasambit nga barangay kag 13 na ka tuig sa serbisyo.
Ang mga complainants amo sanday Bryan Joshua Celiz, 19; Joel Zepeda, 20; Kevin Lee Jaboneta, 21; and alias “Jenel”, 16, lunsay mga residente sang amo man nga lugar.
Sa interview sang Bombo Radyo kay Police Major Mary Grace Borio, spokesperson sang Police Regional Office VI, iya ginpahayag nga nagmandu na si Police Brigadier General Sidney Villaflor sa director sang Iloilo City Police Office nga magpatigayon sang maid-id nga imbestigasyon kag kun may ebidensya, pasakaan sang nagaka-igo nga kaso kriminal kag administratibo ang nasambit nga pulis.
Suno kay Borio, wala ginatolerar sang Philippine National Police ang kaangay nga ginhimo ni Galvesolo nga makabig nga conduct unbecoming sang isa ka police officer.
Mabaskog man nga ginkondenar sang pamunuan sang Police Regional Office VI ang ginhimo sang nasambit nga pulis.
Sa subong, nagapadayon na ang motu proprio investigation sang Internal Affairs Service.
