ILOILO CITY – Nakahanda ang director kag film maker nga si Joel Lamangan nga maghimo sang isa ka pelikula nga nagakontra sang upcoming pro-Marcos film nga “Maid in Malacañang.”
Sa ginpatigayon nga launching sang ML50 campaign, isa si direk Joel sa mga nag-upod.
Ang ML50 ang isa ka campaign nga naga-commemorate sang ika-50 anyos nga deklarasyon sang military rule sang anay presidente nga Ferdinand Marcos, Sr. nga amo ang amay ni Ferdinand “Bongbong” Marcos, Jr.
Si direk Joel ang isa man ka anay political prisoner kag nagpamuno sang amo nga launching nga nagpakita sang film screenings, fora kag webinars.
Ginpahayag sang direktor nga handa siya nga mag-direct sang isa ka pelikula nga nagakontra sang historical negationism, particular na ang “Maid in Malacañang.”
Suno sa iya, malantaw siya sang amo nga film kag tan-awon niya kun ano ang mga sala kag ibuyagyag ini sa tawo nga indi insakto ang tanan nga yara sa pelikula kag handa siya nga maghimo sang isa man ka film nga nagakontra diri.
Ang pelikula ang magwa matapos nga nagpungko ang anak sang diktador bilang presidente pagkatapos sang 36 ka tuig nga ginpalayas ang pamilya nagikan sa ila pagginahom.
Si Joel Lamangan ang isa man sa mga aktibista sa tion sang Martial Law.
