ILOILO – Tion na agud nga ilisan ang disenyo sang mga pumpboat nga nagabiyahe sa Iloilo kag Guimaras vice versa kasunod sang natabo nga trahedya sa Iloilo Strait.
Sa interview sang Bombo Radyo kay Commodore Allan Victor Dela Vega, commander sang Philippine Coast Guard Western Visayas, iya ginpahayag nga ang disenyo sang pumpboat sa subong ang makabig nga traditional ukon dinumaan na.
Sa natabo nga trahedya, ginpahayag ni Dela Vega nga nagakadapat na nga tun-an liwat sang gobyerno ang tuhoy sa pagbag-o sang disenyo sang mga pump boat.
Ginpahayag ni Dela Vega nga sila sa Philippine Coast Guard ang indi makapakot kun may matabo nga pugada sa kalalawran bangud nga nagabase lamang sila sa abiso sang weather bureau.
Nagala-um man si Dela Vega nga makapaguwa gilayon sang rekomendasyon ang headquarters sang Philippine Coast Guard kag Maritime Industry Authority santo sa resulta sang imbestigasyon tuhoy sa natabo nga trahedya.
Samtang, indi lamang ang mga pasahero sang nagkulob nga pump boats ang na-trauma kundi lakip man ang mga rescuer.
Suno kay Dela Vega, nagakinahanglan man sang psychosocial services ang mga rescuer bangud nga ang iban sa ila ang indi makatulog matapos ang natabo nga trahedya.
Sa pagkamatuod suno kay Dela Vega, tuman nga kasubo ang nabatyagan sang rescuers bangud nga wala nila masalbar ang mga pasahero nga nagapangayo sang bulig.
Magluwas diri, may pila man ka rescuers nga napilasan sa ginpatigayon nga rescue operatrions.
