ILOILO CITY – Disiplina kag matinlo nga pagginawi ang may pinakadaku nga impact agud nga makalikaw sa COVID-19.
Ini ang pahayag ni Dr. Aretha Liwag, medical specialist sang West Visayas State University Medical Center may kaangtanan sa pagtapna sang local transmission sang virus.
Sa interview sang Bombo Radyo kay Liwag, iya ginpahayag nga sa panimalay ukon sa trabaho man, importante nga mangin matinlo kag well ventilated ang ginatiniran.
Suno kay Liwag, mas makapaayo kun may yara sang ventilation ang balay ukon ang workplace agud nga indi lang magbalik-balik ang ginahaklo nga hangin kag mas makapaayo kun maglikaw sa crowded places.
Ginpahayag ni Liwag nga kun sa mga pampubliko nga lugar, importante nga magsuksok sang face mask kag face shield kag nagakadapat man nga sundon ang 1 meter nga physical distance agud malimitahan ang paglaton sang virus.
Sa tion nga magpauli sa balay, kinahanglan nga magpaligo kag mag-ilis sang bayo, i-separar ang mga butang nga gingamit sa pagguwa kag himuon nga regular ang paghugas sang kamot.
Magluwas diri, may factor man ang pagkaon sang healthy foods kag ang healthy lifestyle.
Para naman sa mga nagpositibo sa COVID-19, ginpahayag sang natungdan nga mas makapaayo nga magpa-admit gilayon sa hospital ukon magpaidalom sa facility quarantine agud nga indi na makalaton sa iban.
