ILOILO CITY – Ginpakigbahin sang nagpanguna sa 2018 Physician Licensure Examination ang iya sikreto sa pagpanguna sa pasinawan.
Si Dr. Jerald Lalaguna Pelayo sang Masbate, ang nakakuha sang rating nga 88.17 percent.
Sa exclusive interview sang Bombo Radyo Iloilo kay Dr. Pelayo, ginpahayag sini nga may disiplina siya sa kaugalingon sa diin ginasiguro sini nga sa tanan niya nga himuon, ginahatag ang tanan nga ikasarang agud wala ini sang hinulsulan.
Antes ini nagkuha sang medisina sa University of the East Ramon Magsaysay Memorial Medical Center sa Quezon City, ginpasiguro anay ni Pelayo nga handa ini physically, socially, mentally kag spiritually sa diin tuman ang pagsalig sini sa Diyos.
Ginpabugal man ni Pelayo nga siya ang pinakauna nga doktor sa ila pamilya.
Isa sa mga nag-impluwensya sa iya nga mangin isa ka doktor amo ang bantog nga American pediatric surgeon nga si Dr. Benjamin Solomon Carson.
Plano naman ni Pelayo nga magkuha sang residency program sa Internal Medicine (IM) kag magkuha sang specialization sa Neurology sa luwas sang pungsod.
Nahibaluan nga si Pelayo ang nagkuha sang sang iya pre-med nga Bachelor of Science in Nursing sa Mountain View College sa Bukidnon sa diin nag no. 1 man ini sa Nursing Licensure Examination sadtong 2011.