Basura kaangay sang plastic, lambat kag iban pa nga mga fishing gears — ini ang pila lang sa mga makit-an sang mga scuba divers nga yara sa idalom sang dagat.
Sa interview sang Bombo Radyo kay Cyndy Sol Rodrigo, iya ginpahayag nga kun mag-dive sila, may mga basura gid siya nga makit-an sa idalom sang dagat.
Nagapati si Rodrigo nga ang mga basura ang indi na bag-o bangud mahimo nga 10 ka tuig na ini nga yara sa dalom sang dagat ilabi na kun plastic bangud wala ini nagakadunot.
Sila sa Reef Wanderers, ginatinguhaan nila nga makabulig apisar sa gamay lang nga butang agud nga madula ang pollution sa dagat.
Ginabuligan man nila ang local government unit nga lantawon ang resources sa idalom sang dagat agud nga makabulig man sila sa pagrekomenda agud maproteheran kag mapabilin nga matinlo ang dagat.
Samtang suno naman kay Flord Nicson Calawag, isa ka licensed fisheries technologist, bastante sa rules and regulations ang pungsod sa pagproteher sang kadagatan apang ginakulang sang disiplina kag political will ang mga lideres.
Pahayag niya, sa bahin sang Antique, may yara sang 33 ka mga marine protective areas sa diin halos tanan nga coastal town ang may yara sini.
May yara man sang masobra 100 municipal sanctuaries ang nasambit nga probinsya.
Nagakadapat nga i-conserve gid ang tanan nga marine protected areas kag mangin ang mga indigenous artificial reefs.
