ILOILO – Kasubong nga organized group ang diskarte sang grupo sang mag-iloy nga nakuhaan sang P6.3 Million nga balor sang illegal drugs sa buy bust operation sa Brgy. Ungka 2, Pavia, Iloilo.
Nahibalu-an nga nadakpan sa buy bust operation ang mag-iloy nga sanday Jennifer Nosotros, 42, kag John Rey Nosotros, 20, sang Brgy. Buntatala, Jaro, Iloilo City kun sa diin nakuha ang P6.3 Million nga balor sang illegal drugs samtang P1.1 ang nakuha kay Lalaine Ereño, 56, nga downline sang mag-iloy, sa buy bust operation sa Zone 5, Brgy. Calaparan, Arevalo, Iloilo City.
Sa interview sang Bombo Radyo kay Police Col. Roland Vilela, director sang Iloilo Police Provincial Office, iya ginpahayag nga ang transaksyon ang nagakatabo sa New Bilibid Prison kun sa diin ang utod ni Jennifer Nosotros nga si Jovan Abanto nga napreso sa nasambit nga jail facility, amo ang nagapangita sang source.
Suno kay Vilela, sa tion nga matigayon na ang transaksyon, ang supply ang ginapadala sang courrier nga nakilala lamang sa pangalan nga Leng-Leng nga amo naman ang nagahatag sa mag-iloy nga Nosotros.
Ginpahayag ni Vilela nga ginapaagi sa Roll-On Roll Off vesel ang pag-transport sang illegal drugs kag kun mabaton na sang mag-iloy, ila ini nga ginabaligya sa mga parokyano.
Santo sa monitoring, antes pa man ang Dinagyang Festival, 2 ka kilo sang shabu ang ginpadala sa Western Visayas kun sa diin ang 1 ka kilo ang ginpadala sa Iloilo kag ang nabilin ang ginpadala sa Bacolod City.
Ang shabu nga nakuha sa mag-iloy nga Nosotros kag sa downline nga si Ereño ang kabahin pa sang isa ka kilo nga ginpadala sa Iloilo.
