Nagrequest sang kopya sang desisyon ukon dismissal order nagikan kay Iloilo City Mayor Jerry Treñas ang legal counsel ni Joe Mari Esteral, ang Book Binder II sang City Civil Registrar’s Office nga amo ang ginaangot bilang bagman ni anay Local Civil Registry head Mr. Juncae Manikan tuhoy sa ginapahayag 180 ka peke nga kasal sa syudad.
Matandaan nga sa sulat ni Atty. Hernando Galvez kay Mayor Treñas nga napetsahan Abril 8, 2021, ginpahayag nga wala ginpahanugutan si Esteral nga magreport sa iya trabaho sang tuig 2019 apang ang basehan amo lamang ang ‘undated document’ nga ginpirmahan nanday Atty. Fhaymore Gascon, Legal Officer III, kag gin-aprubahan naman ni Atty. Edgardo Gil, city legal officer, kag gin-aprubahan man sang City Administrator nga si Melchor Tan.
Sa interview sang Bombo Radyo kay Atty. Galvez, iya ginpahayag nga bangud wala sila sang rekord natuhoy sa ginaclaim ni Treñas nga dismissal order, nagahingyo sila sang kopya sang amo nga order nga may unod nga impormasyon kun san-o ini ginpatuman, san-o ginserbe kag sin-o ang nagbaton.
Suno kay Galvez, sang Hulyo 2020, nagrequest man sila sa opisina sang alkalde nga kun mahimo nila i-examine, kuhaan sang picture kag i-photocopy ang rekord sang kaso ni Esteral.
Apang, Enero 13, 2021 na nila nabaton ang 160 ka pahina nga kopya sang nasambit nga rekord sa diin ginapahayag nga wala ini sang table of contents, wala sang arrangement, wala sang pages kag wala na bind sang maayo sa diin posible madugangan kag madaya ang dokumento.
Hugot man nga ginpamatukan ni Galvez ang nangin pahayag ni Treñas nga nagabutang sila sang layi sa ila nga kamot.
Nagpaninidugan man si Galvez nga magluwas sa pag-reassume sa duty bilang Book Binder II, dapat man nga ihatag kay Esteral ang sweldo sa mga panahon nga wala siya gintugtan nga magreport sa trabaho umpisa sang Nobyembre 2019.
Matandaan nga nangin kontrobersyal sang 2019 si Esteral kag gin-charge sang gross insubordination, grave misconduct, kag gross neglect of duty bangud nagbalik siya sa iya trabaho sa Local Civil Registrar office apisar nga wala sang mandu sa iya nga magbiya sa trabaho matapos nga ginreaasign siya ni Mayor Treñas sa Calajunan Dumpsite sa Mandurriao, Iloilo City.
