Ginkwestyon ni dismissed multi-awarded Chief of Police Charlie Sustento ang pahayag sang legal counsel sang Phil Pharmawealth Inc. nga ginapanag-iyahan ni Iloilo 4th district Cong. Ferjenel Biron.
Ini matapos nga gin-athag ni Atty. Maylene Villanueva, chief legal officer sang nasambit nga kompaniya, nga wala namitlang ang pangalan ni Sustento sa ila ginpasaka nga kaso sa National Bureau of Investigation (NBI) tuhoy sa Phil Pharm Facebook account nga ginapahayag nagapalapta sang sala nga impormasyon batok kay Biron.
Sa interview sang Bombo Radyo kay Sustento, iya ginpahayag nga kun matuod nga wala namitlang ang iya pangalan sa reklamo, kun tani wala siya ginpadal-an sang subpeona sang NBI tuhoy sa paglapas sang Cybercrime Prevention Act of 2012.
Sa pagkamatuod suno kay Sustento, ang iya tiayon pa ang nagbaton sang ginserbe ang subpeona sa ila balay.
Kadungan sini, ginpahayag man ni Sustento nga indi man mahimo nga magmato-mato sa pagpasaka sang kaso sa NBI ang Phil Pharmawealth Inc. nga wala sang pahanugot gikan sa tag-iya nga si Cong. Biron.
Ginpahayag man sang anay hepe nga sa baylo nga mag-usik siya sang tion sa paghimu sang peke nga account kag magpalapta sang fake news, iya na lang nga i-usik ang iya tion sa pagpangita sang palangabuhi-an para may isagod sa iya pamilya.
Sa subong, ginatun-an pa sang legal counsel ni Sustento kun ano ang ila legal remedy nga pagahimuon batok sa kampo ni Cong. Biron.
