Dismissed multi awarded Chief of Police nga si Sustento, ginreklamo sang cyberlibel

Hugot nga ginpanginwala ni dismissed multi-awarded Chief of Police Charlie Sustento nga siya ang sa likod sang paghimo sang peke nga Facebook account nga nagapalapta sang fake news batok kay Iloilo 4th District Cong. Ferjenel Biron.

Ini matapos ang pagpaguwa sang subpeona sang National Bureau of Investigation (NBI) batok kay Sustento bangud sa paghimo sang Philpharm Facebook account nga isa ka peke nga account.

Sa interview sang Bombo Radyo kay Sustento, iya ginpahayag nga indi siya ang naghimu sang nasambit nga account kag wala man sang ihibalo kun sin-o ang matuod nga administrator sini.

Sa pagkamatuod suno kay Sustento, masako siya sa pagpangita sang palangitan-an matapos nga gin-dismiss sa serbisyo kag wala siya sang tion agud nga maghimo sang peke nga account sa social media agud pakalainon ang iya isig ka tawo.

Gin-ako sang anay hepe nga ginkakibot niya may yara sang reklamo batok sa iya sa NBI bangud sa cyberlibel.

Nahibalu-an nga ginatudlo ni Sustento nga si Cong. Biron ang utok sang iya nga pagka-dimissed sa serbisyo matapos ang pagsita sang hepe sa convoy sang mamalidha sadtong 2016 elections sa Dumangas, Iloilo.