ILOILO CITY – Nadakpan paagi sa warrant of arrest ang dismissed police officer nga amo ang ginatudlo nga nag strafing sa balay ni anay Association of Barangay Kagawad -Molo President Romar Martirez.
Sa interview sang Bombo Radyo kay Police Lt. Rene Matulac, ang nagpanguna sa pagserbe sang warrant of arrest, iya ginpahayag nga ang subject sang warrant of arrest amo si Glenn Esguerra nga anay na-assign sa Iloilo City Police Office.
Suno kay Matulac, personal niya nga kilala apang indi niya matul-id kun ano nga mga kaso pa ang ginakaulamiran ni Esguerra.
Ginpahayag ni Matulac nga si Esguerra ang may yara sang kaso nga roberry sa Branch 29 sang Regional Trial Court.
Sa subong, padayon pa ang imbestigasyon tuhoy sa iban pa nga kaso nga ginkaulamiran ni Esguerra.
Si Esguerra ang ginareklamo bangud sa pag-organisa sang drag racing event nga amo ang ginapahayag nga ginhalinan sang iya pag-strafing sa balay ni Martirez.
Samtang, bailable ukon may piyansa nga P100, 000 ang roberry nga kaso sang dismissed police officer nga nadakpan paagi sa warrant of arrest sa Brgy. Ungka, Jaro, Iloilo City.
Sa interview sang Bombo Radyo kay Police Major Gervenson Moyo, hepe sang Oton Municipal Police Station, iya ginpahayag nga ang kaso nga roberry ni dismissed Police Officer Glenn Esguerra ang nag-ugat sang may nagpasaka nga reklamo sang Setyembre 23, 2018.
Suno kay Muyo, si Esguerra ang organizer sang drag racing event nga ginpatigayon sa circumferential road sang Oton sa diin nabunggu-an ang tagreklamo sang motorsiklo nga naga-intra sa nasambit nga aktibidad.
Ginpahayag ni Moyonga ginsita sang grupo ni Esguerra ang tagreklamo bangud sa pagtuga sang distorbo sa nasambit nga karera.
Nagpakilala pa si Esguerra nga isa ka pulis, ginsapote kag pilit nga gin-agaw ang bag sang tagreklamo nga may unod nga dukomento, liyabe sang salakyan kag personal nga gamit.
Nauna nga nadakpan ang duha sa mga kaupod ni Esguerra rason nga nakumpirma nga ang dismissed police officer amo ang nagpanguna sa grupo nga nagsapote kag nag-agaw sang gamit sang tagreklamo.
Sa subong, ila pa nga hulaton ang mandu sang Regional Trial Court tuhoy sa pagkustodiya kay Esguerra nga nagpangatubang sang dismissal sang 2008 bangud sa ginapahayag kaangtanan sa illegal drugs.
