Text and reported by: Bombo Krylle Melliza
Pilason ang isa ka 31-anyos nga dispatcher matapos ginbuno sang konduktor sang jeep sa atubang sang Cultural Hall sa banwa sang Miagao, pasado alas 9:45 sang aga sang Hulyo 14.
Ginkilala ang biktima kay alyas “Neth”, pamilyado kag residente sang Brgy. Calampitao, Guimbal.
Ang suspek naman ginkilala kay alyas “Biboy”, 26 anyos, pamilyado, residente sang Tiolas, San Joaquin kag isa man ka konduktor.
Sa interview sang Bombo Radyo kay Police Major Richard Lao, hepe sang Miagao Municipal Police Station, ginpahayag sini nga may nauna na nga away ang duha sang Sabado, Hulyo 12, sa Mohon Terminal bangud sa agaway sa pasahero.
Sang Lunes sang aga, nagkitaay ang duha sa jeepney terminal sa plaza sang Miagao.
Nagluntad ang tensyon sa tunga nila, nga nagsugod sa pagtulukay, pagpabati-bati kag pagsuyaay.
Una nga gin sumbag sang suspek ang biktima, kag sang nagdumugay sila, ginkuha sang suspek ang kutsilyo halin sa front seat sang jeep kag ginbuno si “Neth”, nga naigo sa wala nga braso.
Gilayon ini gindala sa ospital kag subong stable na ang kondisyon.
Narekober man ang kutsilyo nga may 10 ka pulgada ang kalabaon.
Na-detain ang suspek sa Miagao Police Station apang ginrelease sang alas 3 sang kaagahon matapos mag-expire ang reglementary period. Sa pihak sini, ginpahayag sang pamilya sang biktima nga ila ginahanda na ang pagpasa sang kaso batok sa suspek.
Reported by: Bombo Krylle Melliza
