ILOILO CITY – Nakarekord na sang ikatatlo nga shooting incident sa subong nga bulan sang Disyembre ang distrito sang Jaro sa Syudad sang Iloilo.
Una diri amo si Edranil Umadhay nga ginluthang sa Tabuc Suba, Jaro Iloilo City kag Eleazer Galon nga ginluthang man sa MV Hehanova, Jaro Iloilo City.
Ikatatlo na ang nagluntad man nga pagpangluthang-patay kaina sang aga sa diin gin-finishing sang suspek ang biktima sa Sambag, Jaro, Iloilo City.
Ang biktima amo si Jerome Embultura, 46 anyos, residente sang Jalandoni-Wilson, Iloilo City Proper kag isa ka tokhang surrenderee.
Sa interview sang Bombo Radyo kay Police Captain Mark Anthony Gesulga, hepe sang Jaro Police Station, iya ginpahayag nga padayon ang ila pag-follow up sa mga kaso sang shooting incident.
Suno kay Gesulga, kapin siyam ka empty fire cartridge sang .45 caliber ang nasapwan sa crime scene sa diin ginluthang si Embultura.
Naka-angkon sang igo sa ulo suno kay Gesulga ang biktima sa diin ipaidalum man ini sa autopsy.
Gin-ako ni Gesulga nga nabudlayan sila bangud wala sang nagakaigo nga ebidensya ukon witness agud ma-imbestigaran ang mga suspek.
Bangud sini, naghingyo man si Gesulga sa publiko nga kun may yara sang witness nga nakakita ukon nakakilala sa mga suspek, indi magkahadlok nga makig-angot sa otoridad agud mas mapadasig man ang imbestigasyon.
Dugang pa sang natungdan, ang tanan nga nasapwan nga fired cartridge sa mga shooting incident ang ipaidalum sa cross matching kag ballistic examination agud mahibaluan kun isa lamang ang suspek.
Lunsay naka jacket nga itom, dalargo, kag full face nga helmet ang mga riding in tandem suspects suno kay Gesulga.
