ILOILO CITY- Natalana nga magsapol ang Technical Working Group para sa consolidation sang divorce bill nga gin-aprubahan sang House committee on population and family relations.
Sa interview sang Bombo Radyo kay Guimaras Lone District Representative Ma. Lucille Nava,chairman sang Committee on Population and Family Relations sa House of Representatives, iya ginpahayag nga sa Pebrero 12 istoryahan sang technical working group ang House Bill 100 ukon ang Absolute Divorce Act .
Ang Technical Working Group ang ginabug-usan nanday Albay 1st District Rep. Edcel Lagman, Reps. Arlene Brosas sang Gabriela; Ma. Victoria Umali sang A-Teacher party-list; Juliet Marie Ferrer sang Negros Occidental, kag Ma. Lourdes Acosta-Alba sang Bukidnon.
Suno kay Nava, pila sa mga grounds kun ngaa ginpasar ang nasambit nga hagna amo ang may kaangtanan sa mas madasig nga proseso sang annulment kag ang mas barato nga balaydan.
Samtang, gin-athag ni Nava nga pagkatapos sang meeting sang Technical Working Group, kinahanglan pa nila nga magdihon sang substitute bill kag i -presentar sa kumitiba agud tun-an kag ipaidalom pa ini sa pagbotohay kun aprubahan ukon indi.
Matandaan nga sa ginpatigayon nga hearing sang House committee on Population and Family Relations, gin-aprubahan sang panel ang House Bill No. 100 ukon ang Absolute Divorce Bill of 2019, nga gin-balay ni Albay 5th District Rep. Edcel Lagman.
