Ginhingyo ni Public Works Secretary Vince Dizon si Batangas 1st District Representative Leandro Leviste nga ibulgar ang mga pangalan sang mga tinawo halin sa Department of Public Works and Highways (DPWH) nga ginaalegar nagapakigkita sa mga kontraktor para maka-secure sang kickback.
Ini ang sabat sang tiglikom matapos ang press conference ni Leviste kahapon, Oktubre 16, kun sa diin ginkwestyon sini ang posible nga koneksyon sang team ni Dizon sa mga kontraktor. Ginsiling sang kongresista nga may mga nakasugid sa iya nga may mga myembro sang team ni Dizon nga amo mismo ang mga kontraktor.
Gindugang man sini nga may iban naman nga mga tinawo nga nakasugod na sa pagsapol sa mga kontraktor agud makig-negosyar.
Gin-ako naman ni Leviste nga verbal lang ang iya nga impormasyon kag wala sang ebidensya nga nahatag sa iya, apang mapatihan ang iya source suno sa mamalidha, kag indi lang isa kundi madamo ang nakasugid sini sa iya.
Sa bahin ni Dizon, nanindugan ini nga sa iya ginpili nga mga undersecretary, wala siya sang nahibal-an nga may yara sang kontraktor. Apang gindugang sini nga handa siya nga makigkita kay Leviste para makakuha sang impormasyon.
“Sa pagkakalaam ko dito sa mga Undersecretaries na ating inaya, at hindi madaling mag-aya ng Undersecretary sa DPWH sa panahong ito, wala sa kanila ang contractor,” suno sa tiglikom.
Nagpasalig man ini nga magahimo siya sang internal investigation kaangot sa sini nga alegasyon.
Gindugang man sang tiglikom nga may mga kunsekwensya gid pananglitan mapamatud-an nga may mga tinawo pa sa ahensya nga nagapakig-negosyar sa mga kontraktor para sa kickback.
Pahayag sini, indi lang pagkakas sa pwesto ang maabtan sang mga tawo nga involved sa kurapsyon, kundi kasuhan gid mismo.
“Handpicked ko talaga sila pero iimbestigahan ko sila. Titignan ko kung sino ba dyan ang posibleng either related, kumausap, kung anuman… But I would really appreciate if Cong. Leviste could give me more specifics. If possible, names and circumstances, and believe me I will act on it,” dugang ni Dizon.#
