Ginkumpirmar sang Department of Migrant Workers (DMW) nga duha ka Filipino seafarers ang napatay sa nagluntad nga drone attacks sa mga barko nga nagaagi sa Black Sea.
Suno kay Migrant Workers Secretary Hans Cacdac, may isa pa ka Pinoy nga seafarer ang padayon nga ginapangita samtang 12 ang nasamaran sa sunod-sunod nga pag-atake.
Ginpahayag ni Cacdac nga padayon ang koordinasyon sang gobyerno agud madala pabalik sa Pilipinas ang mga bangkay sang duha ka napatay kag mapangita ang isa pa nga missing nga tripulante.
Ang una nga biktima napatay sa drone attack sang Hulyo 6, kag ginahanda na sang gobyerno ang pagpauli sang iya bangkay. Ang ikaduha naman nga casualty ang na-rekord sang Hulyo 19. Ginakontak na sang DMW ang iya pamilya agud mahatagan sang kinahanglan nga bulig.
Ginsiguro sang DMW nga may assistance nga ihatag sa mga pamilya sang duha ka napatay.
Suno pa sa tiglikom, as of July 20, siyam na ka mga barko nga may sakay nga 139 ka Filipino seafarers ang naapektuhan sang mga drone attacks samtang nagaagi sa aminhan nga bahin sang Black Sea.
Sa 12 ka nasamaran, apat na ang nakapauli sa Pilipinas, samtang ang walo padayon nga ginabulong kag ginahatagan sang psychological support sa isa ka wala ginsapubliko nga lugar.
Ang nabilin nga 124 ka Filipino seafarers ang luwas na sa katalagman kag wala sang naangkon nga pilas.
Padayon man ang gobyerno sa pagtanyag sang evacuation kag repatriation.
Sa pihak nga bahin, ginausisa na sang DMW kun may responsibilidad ang mga ship owners kag manning agencies sa posible nga paglapas sa mga protocol sa pagpadalagan sang barko sa delikado kag war-risk areas.
Ginpahanumdom man sang DMW nga may kinamatarong ang mga seafarers nga magbalibad sa paglayag pakadto sa mga high-risk ukon warlike areas, kag indi sila dapat madiskriminar ukon mapabay-an sa ila masunod nga trabaho bangud sini.
Dugang pa sang DMW, ang tanan nga pantalan sa Ukraine ginakabig na subong nga warlike operations area, samtang ang Black Sea ginakabig nga high-risk area, gani ginapanawagan ang mga shipping companies nga likawan ang pag-agi sa sini nga mga lugar agud maprotektahan ang kabuhi sang mga tripulante.#
