Ginkumpirma sang Department of Migrant Workers (DMW) nga nagsaka na sa walo ka mga Filipino seafarers ang na-rescue matapos gin-atake sang Houthi rebels ang barko nga MV Eternity C sa Red Sea.
21 ka mga Pinoy ang sakay sa amo nga barko, kag nagpabutyag ang DMW nga nagalaum ini nga buhi pa kag hilway sa katalagman ang 13 ka iban pa nga seafarers. Ini apisar sang nagaguwa nga reports nga may tatlo na nga nagkalamatay, kag ang iban naman ang gin-abduct sang rebelde nga kaalyado sang Iran.
Suno kay DMW Sec. Hans Cacdac, ang lima ka Filipino crew sang MV Eternity C ang nakit-an sang nagresponde nga rescue teams, samtang separado naman nga nakit-an ang tatlo ka iban pa nga mga Pinoy matapos ang 24 oras nga pagpa-utaw-utaw sa dagat.
Tanan sila ang yara sa maayo nga kondisyon apisar pa sang malawig nga pagtinir sa tubig.
Nakabaton na ang gobyerno sang impormasyon halin sa United Kingdom Maritime Trade Operations paagi sa Philippine defense attache sa Bahrain nga “at least three Filipinos” ang napatay apang ini ang “subject to confirmation.”
Base sa maritime security forces, nag-atake ang Houthis sa Eternity C paagi sa sea drones kag rocket-propelled grenades nga ila ginpasigabong paagi sa speed boats.
Ini na ang ikaduha nga atake sang Houthis sa isa lang ka semana. Ang una nga gin-target sini amo ang MV Magic Seas kun sa diin nakaluwas ang 17 ka mga Pinoy nga natalana naman mag-abot sa Pilipinas subong nga adlaw, Hulyo 11.#
