Gina-imbistigaran na sang Department of Migrant Workers (DMW) ang gina-alegar nga anomaliya nga P1.4 billion land and acquisition deal sang Overseas Workers Welfare Administration (OWWA) nga wala sang pahanugot sang Board of Trustees.
Ginkumpirmar ni OWWA Administrator Patricia Caunan ang ginahiwat nga imbestigasyon amo nga hatagan ligwa ang due process kun sa diin kalakip sa gina-imbestigaran amo ang gintal-usan niya nga si anay OWWA Administrator Arnell Ignacio.
Suno pa sa bag-o nga OWWA Administrator, ang ginbakal nga duta ang pagapatindugan kuntani sang halfway house ukon dormitory-type accomodation para sa overseas Filipino workers (OFW’s)
Ginpat-od naman sang opisyal nga bilang bag-o nga administrator sang ahensya nga magahiwat sila sang nagakaigo nga audit, magapangayo- man sila sang legal opinion sa Department of Justice (DOJ), kag magakooperar sa Commission on Audit.
Ginpunto man ni Caunan nga sagrado ang kaban sang banwa kag sang mga Overseas Filipino Workers kabangdanan seryoso sila sa ginahimo nga imbestigasyon.
Gin-athag man ni Caunan nga ang P1.4 billion nga pondo ang wala naghalin sa trust fund.
