ILOILO – Indi pa matumod sang Department of Energy (DOE) kon ano ang pat-od nga ginhalinan sang nagluntad nga blackout sa Panay, Guimaras, kag Negros Islands kagab-i.
“Wala pa ‘ta naka-receive sang full report halin sa mga natungdan nga powerplant, kag subong man sa transmission company naton. Early pa sa aga, so ginahulat pa naton ang ila incident report agud mahibaluan gid naton ang ginhalinan sang power interruption kagab-i,” pahayag ni Engr. Jose Rey Maleza, Officer-in-Charge (OIC) sang DOE – Visayas Field Office sa interview sang Bombo Radyo Iloilo.
Suno kay Maleza, may ginapatigayon nga imbestigasyon ang DOE kag kinahanglan nila ini bilang basehan agud makapa-gwa sang konkreto nga impormasyon kag pagpaathag sa publiko.
Magahimo sila sang report kag igapasa ini sa DOE- Central Office agud mahimuan sang desisyon sang mahimo atubangon sa kon diin naghalin ang power interruption.
Aminado ang DOE sa lapnagon kag makahalalit nga epekto sang blackout nga nag-apekto sa bug-os nga mga isla sang Panay, Guimaras, kag Negros, sa diin nagluntad ini takna alas 5:27 sa hapon kag liwat nga nagsiga sang malapit na alas nuebe sa gab-i.
“Madugay-dugay ni siya kay ang aton mga planta nga coal, medyo madugay na siya ibalik sa linya,” siling ni Malanez.
Suno kay Malanez, may mga nagakatabo sa sistema nga ginatawag “immediate or emergency” nga makatuga sang teknikal kag mekanikal nga problema, kag ang mga ini ang indi nila makontrol kag wala nila ginahungod.
“Nagapangayo kami sang pasaylo sa tanan nga nahalitan sang power interruption. Ini tanan ang wala ginahungod. Before sang power interruption, may ara na tani kita sang daku nga suplay, sobra na aton nga suplay sa bilog nga Visayas, kag in fact, aton ginapaabot nga until sa Disyembre, wala na sang problema, provided nga wala lang ‘ta sang mga major trouble sa mga linya sang kuryente sa mga planta,” dugang ni Malanez.
