Ginpasalig sang Department of Energy (DOE) nga hugot ang monitoring sini sa power situation sa Pilipinas kasunod sang deklarasyon sang Philippine Atmospheric, Geophysical and Astronomical Services Administration (PAGASA) nga nagsugod na ang warm kag dry season sa Pilipinas.
Suno sa ahensya, ginabantayan sini kun masaligan pa ang grid paagi sa pag-update sang power outlook agud makit-an kun may pagbag-o sa operation sang power generating units.
Nagapakig-angot man ang ahensya sa iban nga government agencies agud nga may “timely approval” sang regulatory requirements para matapos na ang power facilities.
Ginpahanumdom man sa National Grid Corp. of the Philippines (NGCP) nga dasigon kag tapuson na ang transmission projects sa tunga tunga sang tuig ilabi na ang Hermosa-San Jose 500 kilovolt (kilovolts) Transmission Project kag ang Cebu-Negros-Panay (CNP) 230 kilovolts Stage 3 backbone project.
Ang Cebu-Negros-Panay project ang target nga matapos subong nga bulan sandig sa ginpasalig sang NGCP.
Suno pa sa ahensya, ang Luzon grid ang mahimo makaeksperyensya sang Yellow Alert sa April kag May bangud naganubo na ang kapasidad sang hydroelectric power plants bangud sa El Niño phenomenon. Ginpasalig man nga normal reserve level ang iya sang Visayas kag Mindanao grids sa second quarter sang tuig.#
