Nagpangabay ang Department of Energy sa mga ahensya sang gobyerno nga magkinot man sa paggamit sang kuryente subong nga may yara sang oil crisis nga ginapalala pa sang Ukraine-Russia conflict.
Suno kay Energy Undersecretary Gerardo Erguiza, kun sundon ini sang government agencies, makakinot ang pungsod sang tubtub sa 24 megawatts sa isa ka tuig nga katumbas sang P840 million.
Bastante na ini nga kantidad suno sa iya agud nga makatukod sang diesel power plant.
Sang Marso 14, nag-isyu ang DOE sang abiso sa government agencies nga istrikto nga ipatuman ang Government Energy Management Program (GEMP) agud nga malab-ot ang 10% savings sa elektrisidad kag sa fuel consumption.
Lakip diri ang pagpatay sang suga kag computers sa tion sang lunch breaks luwas lang kun may ‘No Noon Break’ policy.
Ang audit team sang DOE ang magapatigayon man sang random spot checks kag maga-isyu sang energy ratings agud nga mamonitor ang mga ahensya sang gobyerno.
