Apisar sang nagalala nga away sa tunga sang Ukraine kag Russia, ginpahayag sang Department of Energy (DOE) nga indi mag-isol ang Pilipinas sa kasugtanan sini sa Rosatom State Atomic Energy Corporation, isa ka Russian state corporation nga naka-base sa Moscow.
Ang amo nga korporasyon ang may yara sang “nuclear power deal” sa Pilipinas sa pagpatigayon sang pagtuon para sa gina-target nga pag-install sang nuclear power facilities sa pungsod.
Suno kay Energy Undersecretary Gerardo Erguiza Jr., wala gid sang nakit-an nga problema ang Pilipinas may kaangtanan sa sini nga deal, bangud ang amo nga korporasyon ang nagakooperar para sa pagtukod sang nuclear infrastructure sa pungsod.
Isa sa ginaplano nga mangin kabahin sang feasibility study sa amo nga korporasyon amo ang viability sang pag-repower ukon pagpabangon liwat sang Bataan Nuclear Power Plant (BNPP).
Ang BNPP amo ang power generation nga wala man nagamit sang pungsod halin sang 1980s apang matunog subong nga gina-istoryahan nga i-revive sa tunga sang ginalantaw nga iga-suprer nga power crisis sa Pilipinas sa masunod nga mga tinuig.
Gin-athag man sang energy department nga kun magsiling nga magatukod sang nuclear infrastructure, indi man buot silingon sini nga ipatindog gilayon ang nuclear power plant.
Kinahanglan pa suno sa ahensya ang madamo nga pagtuon may kaangtanan sa safety, security, safeguards, human capacity, electrical grid, management, financing, radiation, fuel cycle, emergency preparedness, kag madamo pa nga bagay nga dapat ikonsiderar. Magluwas sa Russia, may deal man ang Pilipinas sa firm nga nagikan sa South Korea. ##
