Ginatudlo sang Department of Health (DOH) Region 6 nga ang pag-ulan-ulan ang rason sang pagduging sang kaso sang dengue sa Western Visayas.
Sa interview sang Bombo Radyo kay Dr. Bea Camille Natalaray, Spokesperson sang Department of Health Region 6, iya ginpahayag nga kinahanglan nga sundon sang publiko ang 4S strategy nga amo ang Search and Destroy, Self-Protect, Seek Consultation kag Support Fogging agud malikawan ang balatian nga Dengue.
Suno kay Natalaray, mas mataas sang 72 porsyento subong nga tuig 2025 sa period halin Enero tubtob Pebrero ang kaso sang dengue kon ikumpara sang nagligad nga tuig sa kapareho nga period.
Ginpahayag man sini nga ugalion ang pagpang-limpyo kag pag-ula sang naga-pondo nga tubig sa diin masami ang gina-istaran kag gina-pangitlogan kag mangin breeding areas sang lamok.
Nagpasalig man ang talatapan nga preparado ang tagsa ka rural health unit kon sa diin, gina-monitor ang mga kaso kag may inventory sa stock sang logistics para sa amo nga balatian.
Dugang pa, nagpanugyan man ini nga dapat magpatigayon kag suportahan ang Fogging Activities sa diin mas epektibo ini kon ipatigayon sa alas-6 tubtob las-8 sang aga ukon las-4 tubtob las-6 sa hapon.
Samtang, kon makabatyag sang sintomas “Seek Consultation” ukon magpa-konsulta ilabi na kon hinali lang nga maghilanat kag maglawig sang duha ka adlaw pasaka.
