WESTERN VISAYAS – Indi pa mapat-od sang Department of Health 6 nga magapadayon ang pag negatibo sang mga may sintomas sang Coronavirus Disease 2019 base man sa ginapaguwa nga DOH case bulletin sa diin sa sulod sang duha ka adlaw, wala sang may nagdugang nga positibo sa balatian.
Nagapabilin nga 40 ang kaso sang COVID-19 sa Western Visayas sa diin may yara sang 7 ang patay kag 7 man ang naka recover.
Sa interview sang Bombo Radyo kay Dr. Ma. Sophia Pulmones, pinuno sang Local Health Support Division sang DOH-6, iya ginpahayag nga may mga pending pa nga mga specimen sa Western Visayas Medical Center laboratory nga padayon pa nga gina test.
Suno kay Pulmones, ginapanugyan sang Department of Health base sa ginapaguwa nga Department Circular kag Department Memorandum may kaangtanan sa guidelines sang expanded testing kag paggamit sang rapid antibodies test kits amo ang pag conduct sang polymerase chain reaction (RT-PCR) test kits ukon pagpaidalom sa confirmatory testing.
Pahayag niya, ang (RT-PCR) test kits amo ang ginagamit subong sang Sub-national Reference Lab kag ini ang aprubado man sang Department of Health.
Kun mahimo nga islan sang WVMC Laboratory ang ila nga test kit, kinahanglan nga mag conduct sang parellel test kits kag parallel run ang laboratoryo.
