ILOILO – Amat-amat na nga nagabalik sa kinaandan ang operasyon sang Western Visayas Medical Center kun pagpatigayon sang COVID-19 test ang pagahambalan.
Ini matapos nga naka-angkon sang mechanical problem ang Negative Pressure Room sang nasambit nga hospital.
Sa interview sang Bombo Radyo kay Dr. Marie Jocelyn Te, Medical Coordinator sang Emerging and Re-emerging Infectious Diseases sang Department of Health Region 6, iya ginpahayag nga sa subong, nagapaguwa na sang laboratory result ang nasambit nga hospital sa bulig sang Teresita Lopez Jalandoni Provincial Hospital sa Negros Occidental.
Suno kay Dr. Te, amat-amat na nga ginatadlong ang errors kag nabuhinan ang backlogs rason nga nagadugang man ang mga nagapositibo sa COVID-19 sa Western Visayas.
May kaangtanan naman sa patigayunon nga mortality review, ginpahayag ni Dr. Te nga maga-umpisa na ini sa masunod nga semana kun sa diin may mga eksperto nga magatuon sa medical records sang 11 ka mga napatay.
Sa pagpaathag ni Dr. Te, katuyu-an sang mortality review amo nga mahibalu-an kun ano pa gid ang balati-an sang mga pasyente magluwas sa COVID-19.
