Nagpagwa sang mga paathag ang Department of Health (DOH) Region VI may kaangtanan sa pagpatuman sang nagakaigo nga mga tikang para sa kaso sang Delta variant sang COVID-19 sa rehiyon.
Sa interview sang Bombo Radyo kay Dr. Bea Camille Natalaray, spokesperson kag Head sang Non-Communicable Disease Section sang DOH Region VI, iya ginpahayag nga santo sa pinaka-latest nga rekomendasyon sang COVID-19 Inter-Agency Task Force for the Management of Emerging Infectious Diseases (IATF) yari ang mga pagsulundan sa tion nga may matumod nga Delta cases sa isa ka lugar:
- Nagakadapat nga naka-secure sang negative Reverse transcription polymerase chain reaction (RT-PCR) test ang isa ka pasyente pagkatapos sang iya isolation bag-o ini nga i-tag bilang recovered ukon nag-ayo na sa COVID-19 Delta variant
- Nagakadapat nga ipaidalom sa istrikto nga home quarantine ang mga pasyente nga gin-release sa quarantine facility prior sang detection sang Delta variant
- Ang mga natumod nga close contact sang isa ka Delta patient ang nagakadapat magpaidalom sa 14-day facility-based quarantine kag ipaidalom sa swab test ; Kun magpositibo sa virus, nagakadapat nga ipadala ang ila specimen sa Philippine Genome Center
- Ipaidalom sa swab test kag 14-day facility-based quarantine ang natumod nga second kag third generation close contacts sang Delta patient
Pahayag ni Natalaray, hugot man nga ginarekomenda ang separado nga pasilidad para sa Delta cases kag para sa ila close contacts.
