ILOILO CITY- Magapatigayon sang kaugalingon nga imbestigasyon ang Department of Health- Region 6 may kaangtanan sa ginpasa nga incident report sang Bureau of Fire Protection – Region 6 tuhoy sa pagpadulong sa Boracay sang mga katapo sang ahensya sa diin upod pa nila ang personnel nga nagpositibo sa Coronavirus disease 2019.
Sa interview sang Bombo Radyo kay Dr. Marlyn Convocar, Regional Director sang Department of Health Region 6, iya ginpahayag nga sa nasambit nga incident report, nasaad nga “Official Business’ ang rason sang pagpadulong sang mga personnel sang Bureau of Fire Protection sa Boracay.
Suno kay Convocar, sa nasambit nga incident report , wala nabutang ang pag-upod sang personnel nga nagpositibo sa covid-19 sa diin mismo si Malay, Aklan Mayor Floribar Bautista ang una na nga nagkumpirma nga yara sa manifesto ang pangalan ni Patient 144 sa Western Visayas, nga isa ka locally stranded individual nga taga- Cebu City kag assigned sa Finance Management Division sang ahensya.
Sa subong suno kay Convocar, gina-validate pa sang Department of Health Region ang tanan nga impormasyon nga nasaad sa incident report sang Bureau of Fire Protection.
