ILOILO CITY–Gin-agda sang Assistant  Secretary sang Department of Health for Visayas and  Mindanao ang publiko nga magdonar sang dugo sa Dugong Bombo.
Ini ang may kaangtanan sa ginpatigayon nga  Sandugo Award sa Punta Villa beach resort sa distrito sang Arevalo sa diin naghakot sang pasidungog ang Bombo Radyo Philippines bangud sa pagpatigayun sang nasambit nga blood-letting activity.
Sa Interview sang Bombo Radyo Iloilo, ginpahayag ni  DOH Assistant Secretary Abdullah  Dumama  Jr. nga  iya gina-agda ang publiko nga mag-upod sa voluntary blood donation sang Bombo Radyo Philippines tagsa ka tuig.
Dugang  pa ni Dumama, indi na bag-o sa iya ang bloodletting activity sang Bombo Radyo bangud nga ini ang ginapatigayon sa bug-o nga pungsod.
Ginkilala man sang opisyal ang maayo nga corporate social responsibility sang network kag ginhingyo ang publiko nga indi magpangduha-duha nga magdonar sang dugo sa Dugong Bombo bangud nga madamu ang nagakinahanglan sang dugo.
Nahibalu-an nga isa ang Bombo Radyo sa nakahatag sang dako nga supply sang dugo sa blood bank.