ILOILO – Ginaduso sang Department of Health nga pataason ang age requirement sa mga tawo nga nagapanigarilyo.
Sa interview sang Bombo Radyo kay John Richard Lapascua, Senior Health Program Officer sang Department of Health Region 6, iya ginpahayag nga nagikan sa 18 anyos nga age requirement, plano ini nga himuon sa 21 anyos agud nga malikaw ang mga kabataan sa pagpanigarilyo.
Suno kay Lapascua, ang plano sang ahensya ang nagakinahanglan pa sang dugang nga pagtuon sa mga mamumugon.
Nahibaluan nga ginaduso man sang Department of Health ang pagdumili sa pagbaligya sang sigarilyo nga “per stick” ukon binilog.
Katuyuan man sang mga plano sang ahensya nga mabuhinan ang premature mortality bangud sa nagkalain-lain nga balatian nga tuga sang pagpanigarilyo.
