ILOILO CITY – Nagakadapat nga mangin responsable sa pagsaulog sang Valentine’s Day agud nga indi na maglapta ang Coronavirus Disease (COVID)-19.
Ini ang panugyan sang Department of Health sa tanan ilabi na sa mga may yara sang partner.
Sa interview sang Bombo Radyo kay Dr. Jessie Glen Alonsabe, pinuno sang Regional Epidemiology and Surveillance Unit sang Department of Health 6, iya ginpahayag nga mas makapaayo nga sundon ang ABC campaign sang ahensya nga nagakahulugan nga Abstinence, Be Faithful kag use a Condom.
Suno kay Alonsabe, common sense ang gamiton agud nga indi maglapta ang balati-an paagi sa indi pagpadulong sa pampubliko nga lugar kag kun mahimo, likawan anay ang intimate moments kun may yara sang balati-an ang partner.
Ginpahayag ni Alonsabe nga para sa mga may balati-an, likawan ang paghakos kag ang paghalok agud nga indi makalaton sang virus sa iban.
Wala sang abiso halin sa Department of Health nga dumili-an ang paghakos kag paghalok kadungan sang Valentine’s Day.
Sa interview sang Bombo Radyo kay Dr. Roland Jay Fortuna, focal person for Coronavirus Disease (COVID)-19 sang City Health Office, iya ginpahayag nga wala ginadumili-an ang hugging kag kissing sa mga magkahagugma sa adlaw sang tagipusu-on.
Suno kay Fortuna, wala sang dapat kahangaw-an kun wala man lang sang may ginabatyag nga balati-an ukon travel history gikan sa mga pungsod nga may kaso sang Coronavirus.
Ginpahayag ni Fortuna nga sundon ang masami nga ginapahanumdom sang ahensya nga likawan ang pagpadulong sa mga pampubliko nga lugar agud nga indi malatnan sang nasambit nga virus infection.
