GUIMBAL, ILOILO – Ginatugyan na sang Department of Health sa Local Government Unit sang Guimbal, Iloilo ang pagpatuman sang mga lihok agud nga matapna ang local transmission sang Coronavirus Disease 2019 (COVID-19).
Ini matapos nga nagsaka sa duha ang kumpirmado nga kaso sang COVID-19 sa nasambit nga banwa.
Sa interview sang Bombo Radyo kay Department of Health 6 Director Dr. Marlyn Convocar, iya ginpahayag nga ang katungdanan lang sang ahensya amo nga magkumpirma ukon maghatag sang update tuhoy sa nasambit nga virus.
Suno kay Convocar, ang Local Government Unit sang Guimbal ang may katungdanan sa pagpatuman sang lockdown ukon ano man nga sahi sang preventive measures.
Sa subong suno sa natungdan, mas makapaayo nga ipaidalom sa lockdown ang banwa agud nga malimitahan ang local transmission sang COVID-19.
Samtang, tuman naman ka hugot ang ginapatuman nga checkpoint sa Guimbal, Iloilo kasunod sang kumpirmado nga local transmission sang nasambit nga virus.
Suno kay Police Staff Sergeant Ramon Gencianeo sang Guimbal Municipal Police Station, 24/7 ang ginapatigayon nga checkpoint kun sa diin gina-check ang temperatura sang tanan nga nagapadulong kag nagaguwa sa Guimbal.
Ang mga may yara sang quarantine pass lang suno kay Gencianeo amo ang ginapahanugutan nga makalusot sa checkpoint.
Sa subong nga kumpirmado na ang local transmission sang COVID-19, ginpahayag sang natungdan nga lauman ang pagbag-o sa ginapatigayon nga checkpoint.
