Ginatun-an na sang Department of Health ang kabangdanan sang liwat nga pagsaka sang numero sang mga bag-o nga kaso sang COVID-19 sa Pilipinas sugod kahapon sa diin nagdangat na ini sa halos 300.
Suno kay Department of Health Undersecretary Maria Rosario Vergeire, isa sa mga ginatan-aw nila nga rason amo ang paggwa sang resulta sang test sang mga Overseas Filipino Workers nga nakapauli na sa pungsod.
Kun madumduman, una na nga ginpahayag sang Department of Health nga nagadangat sa 220 cases kada adlaw nalang ang average sang mga panibag-o nga kaso.
Sini lang nga miyerkules nagdangat sa 350 ang numero sang mga bag-o nga kaso nga amo man ang pinaka mataas nga numero humalin sang Abril 6.
Sa subong, 380 na ang narecord sang Department of Health nga panibag-o nga kaso sang COVID-19 bangud sini nagdangat na sa 15,000 ang kabilugan nga numero.
Sa pihak naman sang pagpauntat sang World Health Organization sa paggamit sang clinical nga bulong nga hydroxychloroquine sa mga pasyente sang COVID-19 padayon sa gihapon ang Pilipinas sa paggamit sini.
Suno kay Vergeire, ginrekomenda sang grupo sang mga ekpserto gikan sa World Health Organization nga mahimo padayunon ang paggamit sang anti-malaria drug tubtob nga hugot ang patigayunon nga monitoring sa mga pasyente nga gingamitan sang nasamabit nga bulong.
Dugang sang natungdan, untaton lang nila ang paggamit sang hydroxychloroquine sa pasyente sa tion nga makitaan na ini sang indi manami nga epekto.
Nahibaluan nga nalakip kun tani ang nasambit nga bulong sa off-labeled drugs nga ginagamit sang World Health Organization sa Solidarity trial sang mga bulong nga posible epektibo batok sa COVID-19.
