ILOILO CITY – Gindula sang Department of Health ang kahangawa may kaangtanan sa mga Locally Stranded Individuals ukon repatriated Overseas Filipino Workers nga nagpauli na sa ila tagsa ka mga balay nga nakatapos na sang 14-day mandatory facility quarantine apisar nga wala pa napaguwa ang resulta sang confirmatory test.
Sa interview sang Bombo Radyo kay Dr. Ma. Jocelyn Te, Medical Coordinator sang Emerging and Re-emerging Infectious Diseases sang Department of Health Region 6, iya ginpahayag nga para sa mga asymptomatic COVID-19 patients, nagatuhaw ang sintomas sa ika-lima tubtub ika-pito nga adlaw sang quarantine.
Suno kay Dr. Te, makabig nga safe na sa virus ang mga nakatapos sang 14-day mandatory quarantine rason nga ginapahanugutan na ang pagpauli sa balay apisar nga wala pa ang resulta sang COVID-19 test.
Ginpahayag ni Dr. Te nga apisar safe na sa virus apang ginapanugyan sa gihapon ang pagpabilin sa balay kun wala man lang sang importante nga transaksyon.
May kaangtanan naman sa pagpaguwa sang resulta sang COVID-19 test, ginkalipay sang natungdan nga madamo na ang numero sang mga pasyente nga naka-recover kag amat-amat naman nga nabuhinan ang backlogs.
May kaangtanan naman sa contact tracing kag sa ginaduso nga Oplan Kalinga ukon ang house-to-house visitation sa mga asymptomatic COVID-19 patients, ginpahayag sang natungdan nga assistance lamang ang mangin katungdanan sang Philippine National Police.
Sa pagpaathag ni Dr. Te, indi lamang mga pulis ang miyembro sang ginaduso nga local contact tracing teams kundi lakip man ang iban pa nga law enforcement agencies.
Gin-athag sang natungdan nga ang Department of Health man sa gihapon ang magapanguna sa contact tracing.
