Ginpasangkad pa sang Department of Health ang monitoring sa tunga sang pagtaas sang kaso sang hand, foot and mouth disease sa pungsod.
Base sa datos sang ahensya sang Agosto 16, naglab-ut na sa 39,893 ang total nga kaso, nga may dugang nga sobra 2,000 sulod lang sang isa ka semana halin sang Agosto 9.
Ginpahayag sang Department of Health nga ang tunga sang mga apektado amo ang mga kabataan nga naga-edad isa tubtob tatlo ka tuig. Ginkumpirmar man nga nagapakig-angot na ang ahensya sa mga lokal nga panguluhan agud mapabakod ang pagbantay sa mga rehiyon.
Ginpahanumdom sang ahensya nga ang hand, foot and mouth disease isa ka makalalaton nga balatian nga nagalapta paagi sa laway halin sa pag-ubo, pagpangatsi, ukon pag-istorya.
Ginpahanumdom man nga kun may sintomas pareho sang hilanat, singaw sa baba, sakit sa tutunlan kag mga arikis sa kamot kag tiil, kinahanglan dayon magpakonsulta sa health center.
Kag kun mild lang, ginarekomendar ang isolation sa sulod sang pito tubtob napulo ka adlaw kag ang regular nga paglimpyo sang mga gamit kag paghugas sang kamot sulod sang 20 ka segundo.
