ILOILO CITY – Mas pasangkaron pa sang Department of Health (DOH) ang kampanya agud nga mapasalig sa publiko nga safe ang gamiton sang Pilipinas nga bakuna batok sa COVID-19.
Sa interview sang Bombo Radyo kay Dr. Mary Jane Juanico, COVID-19 spokesperson kag pinuno sang Infectious Disease Section sang DOH Region VI, iya ginpahayag nga subong nga semana, umpisahan na ang dululungan nga pagpatigayon sang mga orientation kag public meetings sa bug-os nga pungsod.
Suno pa kay Juanico, nagapakig-angot man ang DOH sa iban nga ahensya sang gobyerno agud nga makabulig sa lapnagon nga kampanya para sa mass vaccination program.
Ini ang kasunod sa nagagwa sa mga resulta sang surveys nga madamo sa gihapon sa mga tawo sa Pilipinas ang nagapamatok sa pagpabakuna bangud sa mga kwestyon sa proseso sang vaccine development kag mga posible side effects sini sa lawas sang tawo ilabi na sa mga may comorbidities.
Ginahulat pa ang dugang nga mandu halin sa national government para sa masunod nga tikang sang DOH Region VI kag iban pa nga guidelines para sa vaccination.
Gina-engganyo man ang mga loal government units nga magpain sang pondo para sa pagbakal sang kaugalingon nga bakuna.
Una diri, ang Iloilo City kag ang Iloilo Provincial Government ang lunsay na nakapirma sang kasugtanan kaupod ang national government kag AztraZeneca para sa advance purchase sang COVID-19 vaccine.
Kaina, nagpahayag na ang Malacañang paagi kay Presidential Spokesperson Harry Roque nga magaabot na sa Pilipinas ang una nga suplay sang COVID-19 doses sa Pebrero. Ang una nga 50,000 doses sang COVID-19 vaccine ang magahalin sa Sinovac, drug maker sang China.
Kaina sa online briefing, una naman nagpahayag si Roque nga lauman nga maabot sa Pilipinas sa bulan sang Hunyo ang bakuna sang Pfizer; samtang maabot naman ang bakuna sang AstraZeneca sa Hulyo.
