Nagpabutyag sang kahangawa ang Department of Health (DOH) kasunod sang pagdugok sang mga tawo sa kontrobersyal nga ‘white sand’ beach sa Manila Bay.
Ini matapos hayag-hayagan nga ginlapas sang publiko ang minimum health standards sang ginbuksan na ang nasambit nga lugar sa publiko sang tinalikdan nga weekend.
“Ito ay isang nakakabahalang sitwasyon. Alam natin lahat hindi pa ho nawawala ang virus dito sa atin. Kung meron tayong proyektong ganito ito ay maganda at kahanga hanga ngunit kailangan pa rin nating i-enforce ang minimum health standards,” pahayag ni Health Undersecretary Maria Rosario Vergeire sa isa ka virtual briefing subong nga Lunes, Setyembre 21.
Liwat nga nagpaandam ang opisyal nga tuman kadaku ang risgo sang coronavirus disease 2019 (COVID-19) transmission kun padayon nga lapason sang mga tawo ang health protocol samtang nagapapicture kag nagalagaw sa ‘white sand’ beach.
Ginpahayag ni Vergeire nga sang nakabaton sila sang report sang large gathering sa lugar, gilayon nila ini nga ginpalab-ot sa Department of the Interior and Local Government (DILG) kag ang nasambit nga ahensya ang nagpakig-angot sa City of Manila local government unit (LGU).
Kasunod sini, ginpadala ang dugang nga pwersa sang Philippine National Police (PNP) agud mapatuman ang physical distancing.
Nahibaluan nga gilayon man nga ginsirado sa publiko ang Manila Bay matapos ang insidente sang weekend. #
