Nagpahanumdom liwat ang Department of Health sa publiko nga malikawan lamang ang halit nga dala sang palupok kun likawan ang paggamit sini — legal man ini ukon iligal nga klase sang firecrackers.
Gin-isyu ni Health Assistant Secretary and Spokesperson Albert Domingo ini nga statement matapos may isa na nga na-rekord nga patay sa Pilipinas bangud sa palupok kag ilabi pa nga nagadamo ang kaso sang injuries.
Ang fireworks kaangay lamang sa bomba suno kay Domingo kag indi na dapat magpatuga-tuga sa paggamit sini kundi maghulat na lang sa mga propesyonal kaangay sang naga-organisar sang community fireworks.
Sa record sang ahensya, ang boga ang nagapanguna nga rason sang injuries, ginasundan sang five star, Piccolo, kag Kwitis nga lunsay mga iligal santo sa pahayag sang Philippine National Police (PNP).
Sa report sang ahensya, isa ka 78-anyos nga tigulang halin sa Central Luzon nga active user sang Judas belt ang na-rekord nga napatay.
Gin-admit siya sang Disyembre 22 matapos nalukpan sang Judas belt nga siya man ang nagsindi. Napatay siya sang Disyembre 27.
Sa 125 ka kaso sang injuries subong sa pungsod, may mga kaso na sang amputation nga kadam-an mga kabataan.
102 sa mga pasyente ang mga menor-de-edad suno sa data sang 62 sentinel sites.
Ang pinaka-komon nga nahalitan sa mga pasyente amo ang ila mga mata samtang may iban naman nga nagpalamungol bangud sa tuman ka tunog nga paglupok. Nagpahayag man ang DOH nga wala sang kasiguruhan nga mabalik pa ukon masugpon ang parte sang lawas nga mautod kun malukpan sang firecrackers.
