Nagdepensa ang Department of Health (DOH) Region VI sa nangin akusasyon ni Iloilo City Mayor Jerry Treñas nga wala sila sang ‘sense of urgency’ sa rollout sang COVID-19 vaccine.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang DOH Region VI, iya ginpahayag nga sa 99 ka mga ospital kag infirmary sa Western Visayas 94 na diri ang mga nahatagan na sang 16,880 nga second dose sang Sinovac Vaccine.
Gin-athag ni Juanico nga wala nila ginatago ang mga bakuna sa ila cold chain equipment bangud padayon ang ila alokasyon sang mga bakuna.
Gin-ako man sang natungdan nga may mga ospital sa syudad sang Iloilo nga indi pa preparado sa COVID-19 vaccination kag wala pa nakahitso sang mga kinahanglanon nga dokumento.
Suno kay Juanico, nagapakig-angot man sila City Health Office may kaangtanan sa allocation, procedures nga ginasunod, distribution kag administration sang COVID-19 vaccines.
Nagpasalig man si Juanico nga ginaobra nila ang tanan agud mapanagtag na ang tanan nga COVID-19 vaccine bangud nahangpan nila ang importansya sini sa tunga sang nagapadayon nga pagsaka sang COVID-19 cases sa Iloilo City.
