Nagpagwa ang Department of Health (DOH) sang public health advisories kaangot sa sulfur dioxide emissions kag ashfall nga naghalin sa Mt. Kanlaon sa Negros Island, sa diin ginpaidalom na ini sa Alert Level 3 matapos ang ginatawag nga “short-lived phreatomagmatic burst” ukon paglupok.
Ang asupre halin sa Mt. Kanlaon ang naglab-ot pa sa 1st district sa Iloilo kag mangin sa Guimaras.
Sa interview sang Bombo Radyo Iloilo kay Dr. Maria Socorro Quiñon, Iloilo Provincial Health Officer, iya ginpahayag nga nagabuga sang volcanic sulfur dioxide gas ang bulkan nga pinakamataas nga emission nga narekord humalin sang mag-umpisa ang instrumental gas monitoring sini.
Suno kay Quiñon, nagakadapat nga magsuksok sang face mask ang mga residente.
Ginpanugyanan man sini ang mga residente nga siraduhan ang pirtahan kag bintana agud indi makasulod ang asupre kag makahiliho nga gas sa mga balay.
Dugang pa sini, nagakadapat man nga mangin mabinantayon kag likawan ang 6 kilometer radius nga permanent danger zone sang Mt. Kanlaon agud malikawan ang gulpi nga paglupok sini, pagkaladagdag sang mga bato kag pagkatiphag sang duta.
